ვაშლრძემჟავა დუღილი: დავით ჩიჩუას რეკომენდაციები

02 ნოემბერი, 2020წ

გაზიარება

ვაშლრძემჟავა დუღილი: დავით ჩიჩუას რეკომენდაციები

ვაშლრძემჟავა დუღილი: დავით ჩიჩუას რეკომენდაციები

ანა გოდაბრელიძემ გასულ შაბათს საკუთარ გადაცემაში “ყველაფერი ღვინოზე ანა გოდაბრელიძესთან ერთად” სოფლის მეურნეობის სამეცნიერო კვლევითი ცენტრის მევენახეობა-მეღვინეობის სამსახურის ხელმძღვანელი დავით ჩიჩუა მიიწვია. სტუმარმა და წამყვანმა ვაშლრძემჟავა დუღილის შესახებ ისაუბრეს. დავით ჩიჩუას თქმით, მიუხედავად იმისა, რომ ჩვენი წინაპრები საუკუნეების მანძილზე ამზადებდნენ ღვინოს, ვაშლრძემჟავა დუღილი მაინც რჩებოდა სათანადო ყურადღების მიღმა.

ჩიჩუამ თქვა, რომ ალკოჰოლური დუღილი სითხის შემადგენლობის იმდენად მკვეთრი ცვლილებაა, რომ როდესაც ტკბილი ღვინოდ გადაიქცევა, ამას ყველა ნათლად ხედავს და აღიქვამს. ამ პროცესისგან განსხვავებით, ის ცვლილებები, რასაც ვაშლრძემჟავა დუღილი იწვევს, ნაკლებად არის შესამჩნევი. მისი ყველაზე აშკარა სიმპტომი მჟავიანობის კლებაა. აღმოსავლეთ საქართველოში იმდენად მარტივად ხდება ალკოჰოლური დუღილიდან ვაშრძემჟავა დუღილზე გადასვლა, რომ ის თითქმის შეუმჩნეველიც კი რჩება.

სტუმრის თქმით, ვაშლრძემჟავა დუღილი პირველად ევროპაში მე-19 საუკუნეში შეისწავლეს. მანამდე ამ პროცესთან დამოკიდებულება მისტიციზმის დონეზე იყო.

მაგრამ მაინც რა ხდება ვაშლრძემჟავა დუღილის დროს?

ამ პროცესში იგივე ბაქტერიები მონაწილეობენ, რომლებიც იწვევენ რძის გარდაქმნას კეფირად ან მაწონად. ისინი გარემოს გარდაქმნიან მათთვის სასარგებლოდ, ახდენენ რა მჟავიანობის შემცირებას. სწორედ ამიტომ, ბაქტერიები ვაშლმჟავას ბევრად უფრო ნაკლებად აგრესიულ და ნაკლები მჟავიანობის მქონე რძემჟავად გარდაქმნიან.

ასევე დაგაინტერესებთ: ანა გოდაბრელიძემ და გურამ ბაღდოშვილმა აპერიტივისა და აპეტაიზერის შესახებ ისაუბრეს

როგორ უნდა წარიმართოს ვაშლრძემჟავა დუღილი ისე, რომ თანმდევი უარყოფითი პროცესები არ გამოიწვიოს?

უპირველეს ყოვლისა, აღნიშნული ბაქტერიებისთვის ოპტიმალური 25-27 გრადუსი ცელსიუსის ნაცვლად, ღვინის ტემპერატურა 18-20 გრადუსს არ უნდა აღემატებოდეს. ასეთ დროს ბაქტერიების ცხოველმყოფელობა ნაკლებია და ისინი ვეღარ ახერხებენ, ღვინის ხარისხი გააუარესონ.

რატომ არის აუცილებელი, რომ ვაშლრძემჟავა დუღილი ჩატარდეს?

ზოგ ღვინოს სჭირდება ის, ზოგს კი ნაკლებად ან სულ არ სჭირდება. თავად მეღვინემ უნდა გადაწყვიტოს, დგას თუ არა ვაშლრძემჟავა დუღილის დაწყების აუცილებლობა. ღვინო ამ პროცესის მეშვეობით უფრო ჰარმონიული და დაბალანსებული ხდება, მაგრამ პროცესის დიდხანს წარმართვა უკუშედეგის მომტანიც შეიძლება აღმოჩნდეს.

ყველაზე მთავარი, რაც სწორად ჩატარებულ ვაშლრძემჟავა დუღილს მოაქვს, არის ღვინის სტაბილურობა. ბოთლში ჩამოსხმული ღვინო, სადაც ვაშლრძემჟავა დუღილი არ ჩატარებულა, შეიძლება გაფუჭდეს.

თუ გვსურს, რომ ღვინომ რძემჟავა ტონები არ მიიღოს და უბრალოდ, შევამციროთ მჟავიანობა სითხეში ვაშლრძემჟავა დუღილის გარეშე, ასეთ შემთხვევაში კორექტირება ხდება ქიმიური გზით. ასეთ დროს ღვინის კორექცია გოგირდით ხდება. გოგირდი თრგუნავს რძემჟავა ბაქტერიებს და არ აძლევს საშუალებას, სათანდოდ გამრავლდნენ და არსებითი გავლენა მოახდინონ ღვინის სტრუქტურაზე.

ხოლო იმ შემთხვევაში, თუ გვსურს ვაშლრძემჟავა დუღილის წარმართვა, ვუქმნით ხელსაყრელ ტემპერატურულ რეჟიმს ბაქტერიებს და არ ვაძლევთ რა ღვინოს გოგირდს 2-3 კვირის მანძილზე, სრულფასოვნად ვატარებთ აღნიშნულ პროცესს. ამის შესახებ გადაცემის წამყვანმა თავად ისაუბრა.

ასევე დაგაინტერესებთ: “ყველაფერი ღვინოზე ანა გოდაბრელიძესთან ერთად” - ტელეკომპანია “რუსთავი 2”-ზე ახალი გადაცემა დაიწყო

გადაცემის სტუმრის სიტყვებით, შეგვიძლია, ვაშლრძემჟავა დუღილი ინოკულაციის გზით დავიწყოთ, რა დროსაც ბაქტერიებს ღვინოში ხელოვნურად შევიყვანთ. მეორე გზა საამისოდ არის ტემპერატურული რეჟიმის ოპტიმალურ ფაზაში დაცვა და ღვინის 2 კვირის მანძილზე ლექზე დაყოვნება. პროცედურების დაცვა აუცილებელია საიმისოდ, რათა ღვინო არ გაფუჭდეს და არ დაზარალდეს ის, ვინც ამ ღვინოს დააგემოვნებს.

შეგახსენებთ, რომ გადაცემა “ყველაფერი ღვინოზე ანა გოდაბრელიძესთან ერთად” 26 სექტემბრიდან ყოველ შაბათს, დღის 12-საათიანი “კურიერის” დასრულების შემდეგ გადის “რუსთავი 2”-ის ეთერში. მისი მედიაპარტნიორი Allwine.ge გახლავთ. გადაცემას საინფორმაციო, სახალისო, შემეცნებითი და საგანმანათლებლო ხასიათი აქვს და მეღვინეობა-მევენახეობის სფეროს მოიცავს.

დავით ჩუთლაშვილი

 

ასევე დაგაინტერესებთ:

ანა გოდაბრელიძე რაჭაში დვალების საოჯახო მარანს ესტუმრა და იქაური ღვინოები დააგემოვნა

ანა გოდაბრელიძე თავის მორიგ გადაცემაში კომპანია “მუკადო ვაინის” მფლობელს გაესაუბრა

საფუარი, ენზიმები, აქტივატორი, გოგირდი - ანა გოდაბრელიძემ და მიშა მესხმა ღვინის დამზადების ტექნოლოგიაზე ისაუბრეს